...

ARDNŞ iri ekoloji layihənin həyata keçirilməsini başa çatdırır

Energetika Materials 18 İyul 2011 17:29 (UTC +04:00)

Azərbaycan, Bakı, 18 iyul /Trend/

ARDNŞ (Azərbaycan Respublikası Dövlət Neft Şirkəti) Bakının Xəzər rayonu ərazisində ekoloji parkın yaradılması üzrə işləri başa çatdırır. Bu barədə bazar ertəsi ARDNŞ-nin Ekologiya İdarəsinin yaydığı məlumatda deyilir.

Ekoloji parkda ARDNŞ-nin balansında olan neftlə çirklənmiş torpaqlarda rekultivasiya işləri başa çatdırıldıqdan sonra əkilmək üçün nəzərdə tutulan və Abşeron şəraitinə introduksiya olunmuş ağac-kol tinglərinin yetişdirilməsi ilə yanaşı, Azərbaycan təbiətinin relikt, nadir, endemik və nəsli kəsilmək təhlükəsi olan ağac-kol növlərinin qorunması və çoxaldılması işlərinə də start verilib.

Parkın elektrik enerjisinə tələbatının 40 faizi alternativ enerji mənbələri hesabına təmin olunacaq. Habelə parkın ərazisində hər biri 10 kilovatt-saat elektrik enerjisi hasil edəcək dörd külək generatoru, eləcə də ümumi gücü 20 kilovat-saat olan Günəş batareyaları quraşdırılıb.

Alternativ enerji mənbələri hesabına hasil olunacaq elektrik enerjisinin ümumi gücü 60 kilovat-saat təşkil edir.

ARDNŞ parkın ərazisində öz struktur bölmələrinin ehtiyacını təmin etmək üçün şitillər yetişdirəcək. Ekoloji park 9,3 hektar ərazidə yaradılır.

Xəbər lenti

Xəbər lenti