Azərbaycan, Bakı, 4 avqust /Trend, müxbir E.İsmayılov/
"Caspian Technology Company" Azərbaycanın Xızı rayonunun Yaşma qəsəbəsində külək enerjisinin regenerasiyası üzrə parkın ("Şurabad" layihəsi) yaradılması çərçivəsində avadanlığın quraşdırılması üçün lazımi infrastukturun quraşdırılmasını başa çatdırıb. Bu barədə cümə axşamı şirkətdən deyilib.
Mənbənin sözlərinə görə, ərazidə betonlaşdırma və yol tikintisi üzrə bütün işlər başa çatdırılıb.
"Betonlaşdırma və yol tikintisi üzrə bütün işlər başa çatıb. Parkın yaradılması üzrə işlərin başa çatma müddəti avadanlığın tədarük müddətindən asılı olacaq", - mənbə qeyd edib.
Onun sözlərinə görə, bir neçə həftə ərzində avadanlığın tədarük müddəti dəqiqliklə məlum olacaq. Avadanlıq Azərbaycana Almaniya və Danimarkadan gətiriləcək. Avadanlıq qısa müddət ərzində gətirilsə, parkın tikintisi üzrə işlər bu ilin sonunadək başa çatacaq, Xəzərdən gedən naviqasiya kanallarının mövsümünün başa çatması ilə bağlı yarana biləcək yubanmada isə bu müddət 2012-ci ilin birinci rübünə keçirilə bilər.
16 külək qurğusundan ibarət olacaq parkın ümumi gücü 48 meqavat təşkil edəcək. Layihə çərçivəsində istifadəsi planlaşdırılan qurğular "Vestas" şirkəti tərəfindən "Caspian Technology Company" ilə uzunmüddətli müqavilə əsasında istehsal edilib. Park istismara verildikdən sonra hər il 201 milyon kilovat-saat elektrik enerjisi istehsal olunacaq. Bu isə öz növbəsində 57 milyon kubmetr qaza qənaət etməyə imkan verəcək.
Müqavilə çərçivəsində parkın istehsal edəcəyi enerji "Azərenerji" ASC-nin paylama şəbəkəsinə ötürüləcək. ASC onu "Bakıelektrikşəbəkə" SC-yə verəcək.
