Azərbaycan, Bakı, 8 avqust /Trend, müxbir E.İsmayılov/
Xəzərin Azərbaycan sektorunda "Abşeron" perspektivli strukturunun kəşfiyyatı və işlənməsi üzrə tərəfdaşlar 6 570 metr dərinlikdə ilk kəşfiyyat qazma quyusunda karotaj işləri aparırlar. Bu barədə bazar ertəsi neft-qaz bazarındakı mənbə deyib. Quyunun layihə dərinliyi 7200 metrdir.
Bu günlərdə qazma işləri çərçivəsində layihə iştirakçıları lay dəstəsinə çıxmalı idilər.
Mənbənin sözlərinə görə, karotaj işlərinin yekunları üzrə məlumatlar əldə ediləcək. Məlumatlar quyunun məhsuldarlığı və kommersiya baxımından karbohidrogen ehtiyatlarının olması ilə bağlı nəticə çıxarmağa imkan verəcək.
"Hazırda quyunun göstəriciləri cəlbedici karbohidrogen ehtiyatlarının olduğuna işarə edir", - mənbə qeyd edib.
ARDNŞ (Azərbaycan Respublikası Dövlət Neft Şirkəti) geoloqlarının qiymətləndirmələrinə əsasən, "Abşeron" strukturunun ehtiyatları 300 milyard kubmetr qaz və 45 milyon ton kondensat təşkil edə bilər.
"Abşeron" bloku Bakıdan 100 km uzaqda 500 metr dərinlikdə yerləşir.
"Abşeron" blokunun iştirakçıları ARDNŞ - 40 faiz, Fransanın Total şirkəti - 40 faiz və Gaz De France Suezdir - 20 faiz.
"Abşeron" strukturu üzrə müqavilə 2009-cu ilin 27 fevralında ARDNŞ və Total arasında imzalanıb. Daha sonra Total müqavilədə iştirak payının 20 faizini "Gaz De France Suez" şirkətinə verib.
Bu artıq xarici şirkətlərin "Abşeron" perspektivli strukturunda ticari cəhətdən əlverişli karbohidrogenlərin hasilatına başlamaq üçün ikinci cəhdidir. 1997-ci ildə bu sahənin kəşfiyyatı və hazırlanması üzrə layihədə 50 faiz iştirak payı olan ARDNŞ, Amerikanın "Chevron" şirkəti (30 faiz - şirkət layihənin operatoru kimi çıxış edib), və "Total" -20 faiz arasında PSA tipli ilk müqavilə imzalanıb. Lakin kəşfiyyat quyusunun qazılmasından sonra yataqda aşkar olunmuş ehtiyatlar ticari cəhətdən cəlbedici olmadığına görə müqavilə qüvvədən düşüb.
