Azərbaycan, Bakı, 9 sentyabr /Trend, müxbir E.İsmayılov/
ARDNŞ tərəfindən Xəzər dənizində iki yeni qazma qurğusunun tikilməsi dənizdə iri layihələrin həyata keçirilməsi baxımından çox vacibdir. Bu barədə Trend-ə cümə günü neft-qaz sənayesinə yaxın mənbə bildirib.
Mənbə vurğulayıb ki, yeni qurğular iri layihələrin gecikmədən həyata keçirilməsini və Azərbaycanda işləyən bütün şirkətlərin ehtiyacını ödəyəcək.
Onun sözlərinə görə, hazırda Xəzərin Azərbaycan sektorunda bir sıra iri layihələr həyata keçirilir, həmçinin ölkə perspektiv strukturların tədqiqatını və yeni yataqların kəşf edilməsini planlaşdırır. Buna görə də mövcud olan iki ədəd üzən qazma qurğusu kifayət etmirdi. Hazırda belə dörd müasir qurğu işə salınıb.
Yeni qurğuların əsas xassələrindən biri onların 1000 metrədək su altında və 8000 metrədək dərinlikdə qazma işləri apara bilmələridir.
