Azərbaycan, Bakı, 12 sentyabr /Trend, müxbir E.İsmayılov/
Yunanıstandakı müəssisələrin özəlləşdirilməsi prosesində iştiraka qədər ARDNŞ (Azərbaycan Respublikası Dövlət Neft Şirkəti) bu ölkədəki vəziyyətin hərtərəfli təhlili və qiymətləndirilməsini aparmaq fikrindədir. Bu barədə bazar ertəsi ARDNŞ-nin yüksək vəzifəli nümayəndəsi bildirib.
"ARDNŞ Yunanıstan hökumətinin qəbul etdiyi müəssisələrin özəlləşdirilməsi proqramında iştirakda maraqlı olduğunu bildirib. Eləcə də bu özəlləşdirmə prosesinin potensial iştirakçısı olan qruplardan biri ilə danışıqlar aparır", - mənbə deyib.
Bir müddət əvvəl ARDNŞ prezidenti Rövnəq Abdullayevin dediyi kimi, şirkət enerji sektorundakı DEPA və digər şirkətlərin özəlləşdirilməsində iştirak imkanlarını nəzərdən keçirir.
Mənbə hesab edir ki, Yunanıstandakı böhranlı vəziyyət ilk baxışda göründüyündən daha dərindir, bu məsələyə diqqətlə yanaşmaq lazımdır və vəziyyət hərtərəfli öyrənilməlidir.
"Biz özəlləşdirilməyə çıxarılan aktivlərin perspektivliyini öyrənməliyik", - ARDNŞ nümayəndəsi deyib.
ARDNŞ Azərbaycanın Dövlət Neft Şirkətidir. 2010-cu ildə ARDNŞ neft-qazçıxarma müəssisələri tərəfindən 7,28 milyon ton neft və 7 milyard kubmetrdən çox qaz hasil edilib. ARDNŞ xarici tərəfdaşlarla birgə "Azəri-Çıraq-Günəşli" (AÇG) yataqlar bloku və "Şahdəniz" qaz-kondensat yatağı kimi iri layihələrdə iştirak edir. ARDNŞ-nin tərkibinə "Azneft" İB (quruda və dənizdə neft və qaz hasilatı müəssisəsi), "Azərikimya" İB (kimya sənayesi müəssisəsi),"Azəriqaz" (qaz paylanması) müəssisəsi daxildir. ARDNŞ ölkədə neft məhsullarının yeganə istehsalçısıdır (balansında iki NEZ-ə malikdir), eləcə də Azərbaycanda, Gürcüstanda və Ukraynada yanacaqdoldurma məntəqələrinə malikdir. ARDNŞ Türkiyənin ən iri neft-kimya kompleksi olan "Petkim"in ortaq sahibidir. Özünün ticarət bölməsi olan "SOCAR Trading" şirkəti vasitəsilə dünyanın müxtəlif regionlarında neft ticarəti həyata keçirir.