Azərbaycan, Bakı, 13 sentyabr /Trend, müxbir E.İsmayılov/
Yanvar-avqust aylarında ARDNŞ (Azərbaycan Respublikası Dövlət Neft Şirkəti) dövlət büdcəsinə ayırmaları ötən ilin müvafiq dövrünə nisbətən 14,6 faiz artırıb. Bu barədə çərşənbə axşamı şirkətin yaydığı məlumatda deyilir.
Məlumata görə, ARDNŞ dövlət büdcəsinə 810,35 milyon manata yaxın vəsait köçürüb ki, bu da ötən ilin müvafiq dövrü ilə müqayisədə 103,2 milyon manat çoxdur.
Avqustda ARDNŞ-nin dövlət büdcəsinə ayırmaları 125 milyon manatdan çox olub. Bu, ötən ilin analoji dövründəkindən 19,9 faiz çoxdur.
Məlumatda deyildiyi kimi, yanvar-avqust aylarında ARDNŞ Dövlət Sosial Müdafiə Fonduna 88,51 milyon manat vəsait köçürüb ki, bu da ötən ilin analoji dövrü ilə müqayisədə 3,3 milyon manat (3,9 faiz) çoxdur.
Avqustda bu göstərici 11,53 milyon manata yaxın təşkil edib.
Sentyabrın 13-nə rəsmi məzənnə 0,7866 AZN/USD təşkil edir.
