Azərbaycan, Bakı, 20 sentyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) və Almaniyanın RWE şirkəti ilin sonunadək Xəzərin Azərbaycan sektorundakı perspektivli "Naxçıvan" strukturunun kəşfiyyatı və işlənməsi üzrə müqavilə imzalamaq niyyətindədir. Trend-in məlumatına görə, bu barədə çərşənbə axşamı jurnalistlərə ARDNŞ-nin yüksəkrütbəli nümayəndəsi bildirib.
Onun sözlərinə görə, müqavilənin hazırlanması çərçivəsində işlər davam edir. Hazırda RWE şirkətinin nümayəndə heyəti Bakıdadır.
"İlin sonunadək biz çox güman ki, müqavilənin hazırlanmasını başa çatdıracağıq və çox böyük ehtimala görə, onu imzalayacağıq", - ARDNŞ nümayəndəsi bildirib.
Perspektivli "Naxçıvan" strukturu üzrə qarşılıqlı anlaşma haqqında memorandum şirkətlər arasında bu il martın 10-da imzalanıb.
Strukturun ehtiyatları 300 milyard kubmetr qaz və 40 milyon ton kondensat həcmində proqnozlaşdırılır.
Perspektivli "Naxçıvan" strukturunun işlənməsi üzrə birinci müqavilə 1997-ci ilin avqustun 1-də imzalanıb. Layihə iştirakçıları bunlardır: ExxonMobil - 50 faiz, ARDNŞ - 50 faiz. Müqavilə karbohidrogenlərin həcminin kommersiya baxımından cəlbedici olmadığının aşkarlanması səbəbindən bağlanıb.
Cari ayda Fransanın "Total" şirkəti "Abşeron" strukturunda iri qaz yatağının kəşf eduildiyini elan edib. İlkin qiymətləndirmələrə görə, yatağın ehtiyatları 350 milyard kubmetr qaz və 45 milyon ton kondensatdır.
Yatağın kəşf olunduğu struktur üzrə artıq əvvəllər müqavilə imzalanıb, sonradan isə ləğv olunub. Ekspertlərin qiymətləndirmələrinə görə, "Abşeron" yatağının kəşfi daha əvvəllər müqavilələrin ləğv edildiyi strukturlardakı yataqların perspektivliyini göstərir.
