Azərbaycan, Bakı, 30 dekabr / Trend müxbir E.İsmayılov/
Azərbaycanda 2012-2020-ci illərdə alternativ və bərpa olunan enerji mənbələrindən istifadə üzrə Dövlət Proqramının hazırlanması və bu strategiya çərçivəsində işlərin təşkili 2020-ci ilədək ölkəyə enerji istehlakının ümumi həcmində alternativ enerjinin payının 20 faizlik həddinə nail olmağa imkan verəcək.
Bu barədə cümə günü Trend-ə Alternativ və Bərpa Olunan Enerji Mənbələri üzrə Dövlət Agentliyi rəhbərinin müavini Cəmil Məlikov bildirib.
Dünən Prezident İlham Əliyev 2012-2020-ci illər üçün Azərbaycan Respublikasında alternativ və bərpa olunan enerji mənbələrindən istifadəyə dair Dövlət Strategiyasının hazırlanması haqqında sərəncam imzalayıb.
Sərəncamda qeyd edilir ki, 2012-2020-ci illər üçün Azərbaycan Respublikasında alternativ və bərpa olunan enerji mənbələrindən istifadəyə dair Dövlət Strategiyasının hazırlanmasını təmin etmək məqsədi ilə Sənaye və Energetika Nazirliyinin Alternativ və Bərpa Olunan Enerji Mənbələri üzrə Dövlət Agentliyinə Azərbaycan Respublikasının 2011-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan 1,0 (bir) milyon manat ayrılsın.
Məlikovun sözlərinə görə, strategiyanın mövcudluğu 2020-ci ilədək Azərbaycanda alternativ energetikanın inkişafının strateji xəttini planlaşdırmağa və qurmağa imkan verir. 2020-ci ilin seçilməsi təsadüfi deyil, çünki bu müddətdə Avropa İttifaqı enerji istehlakının ümumi həcmində alternativ enerjinin payının 20 faiz səviyyəsinə çatdırılmaq niyyətindədir.
Məlikovun sözlərinə görə, Azərbaycan zamanla ayaqlaşır və ölkə alternativ və bərpa olunan enerji mənbələrinin inkişaf etdirilməsi üçün həm maliyyə, həm də texniki imkanlara malikdir.
"Güman edirəm ki, biz strategiyanı nəzərdə tutulmuş müddətdən tez hazırlayacağıq. Agentlik artıq inkişafın strateji məqsədləri üzərində çalışır və biz işin hansı istiqamətlərdə aparılmalı olduğunu bilirik", - o deyib.
Onun sözlərinə görə, hazırda əsas vəzifə strategiyanın hazırlanması və reallaşdırılmasında dövlət strukturlarının iştirakının təşkilidir. Bu prosesə dövlət idarələri, eləcə də Ekologiya və Təbii Sərvətlər Nazirliyi və enerji və istilik təchizatı sahəsində çalışan digər strukturlar iştirak edəcəklər.
Məlikov bildirib ki, dövlət strategiyasının hazırlanmasından sonra ölkədə 2020-ci ilədək alternativ enerjinin maksimum inkişafına nail olmaq üçün bütün zəruri işlər görüləcək.