Azərbaycan, Bakı, 26 noyabr /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) 2013-cü ilin I yarısında "Ümid" qaz-kondensat yatağında ilk hasilat quyusunda qazma işlərini başa çatdırmağı planlaşdırır. Trend-in məlumatına görə, bu barədə bazar ertəsi jurnalistlərə ARDNŞ-nin birinci vitse-prezidenti Xoşbəxt Yusifzadə bildirib.
Onun sözlərinə görə, hazırda quyunun dərinliyi 2550 metrdir. Layihədə isə 6 min metrdən çox nəzərdə tutulub.
"Ümid" yatağında əvvəllər kəşfiyyat qismində qazma işləri aparılan bir quyudan sutkalıq qaz hasilatının həcmi 800 min kubmetr qaz və 140 ton kondensat təşkil edir", - Yusifzadə qeyd edib.
Yusifzadənin sözlərinə görə, ştuserin artırılması yolu ilə yataqda hasilat həcmini çoxaltmaq üçün bütün imkanlar mövcuddur.
"Yeni yatağın imkanları nəzərə alınmaqla ikinci quyunun qazılması planlaşdırılır", - o vurğulayıb.
Mezozoy çöküntülərinin tədqiq edilməsi çərçivəsində hazırda ARDNŞ "Qoşadaş" perspektivli dəniz strukturunda ilk kəşfiyyat quyusunun qazılması üzrə işlər aparır. Hazırda quyunun dərinliyi 1500 metr təşkil edir. Quyu yüksək qaz təzyiqi ilə seçilir.
Yusifzadənin fikrincə, burada yeni yatağın açılması üçün imkanlar var.