Azərbaycan, Bakı, 4 sentyabr /Trend, müxbir A.Axundov/
Bu gün Azərbaycanın sübut olunmuş qaz ehtiyatları 2,6 trilyon kubmetr, neft ehtiyatları isə 2 milyard ton təşkil edir. Bu barədə Trend-ə Energetika və Sənaye Nazirliyindən bildiriblər.
Nazirlikdən deyiblər ki, mövcud göstəricilər 100 ildən çox müddətdə Azərbaycanın qaz sənayesinin inkişaf edəcəyinə zəmanət verir.
1847-2012-ci illər ərzində Azərbaycanda təxminən 2 milyard ton neft, 1928-2012-ci illərdə isə təxminən 650 milyard kubmetr qaz hasil edilib.
Nazirlikdən bildiriblər: "2007-ci ildə "Şahdəniz" qaz yatağının işə salınmasından 2013-cü il avqustun 1-dək olan müddətdə yataqdan 43,9 milyard kubmetr qaz hasil edilib. Bu hasilatdan 23,8 milyard kubmetr qaz Türkiyəyə, 3,6 milyard kubmetr qaz isə Gürcüstana ixrac edilib".
"Şahdəniz" qaz yatağının ehtiyatları təxminən 1,2 trilyon kubmetr həcmində qiymətləndirilir.
