Azərbaycan, Bakı, 4 noyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Qoşadağ" perspektiv strukturunda qiymətləndirmə quyusunun qazılmasına dair qərarı üçölçülü seysmik tədqiqatlar başa çatdıqdan sonra qəbul edəcək. Trend-in məlumatına görə, bu barədə bazar ertəsi jurnalistlərə ARDNŞ-nin geologiya, geofizika və yataqların işlənməsi üzrə vitse-prezidenti Xoşbəxt Yusifzadə bildirib.
"Burada qazma dayandırılıb və hazırda üçölçülü seysmik tədqiqatlar aparılır", - deyə Xoşbəxt Yusifzadə qeyd edib.
Onun sözlərinə görə, seysmik tədqiqatların nəticələri strukturda gələcək işlərin aparılması barədə qərar qəbul etməyə imkan verəcək. ARDNŞ-nin balansında olan köhnə qazma qurğusu keyfiyyətli qazma işləri aparmağa imkan vermədiyindən, Dövlət Neft Şirkətinin "Qoşadağ" perspektiv strukturu üzrə qərarından asılı olaraq, yeni qazma qurğusu lazım ola bilər.
Qazılması mezozoy çöküntüsündən həyata keçirilən quyunun layihə dərinliyi 3500 metr təşkil edəcək. Qazma "Xəzər-6" qazma qurğusundan həyata keçirilir. Qazmanın əsas məqsədi - tədqiqatların aparıldığı ərazidə mezozoy çöküntüsünün neft-qazvermə perspektivliliyinin qiymətləndirilməsidir.
