Azərbaycan, Bakı, 12 avqust /Trend, müxbir Emil İsmayılov/
2014-cü ilin birinci yarısında ARDNŞ-nin (Azərbaycan Respublikası Dövlət Neft Şirkəti) "Azəriqaz" İstehsalat Birliyi (İB) Azərbaycanda istehlakçılara 2,63 milyard kubmetrə yaxın qaz çatdırıb. Bu barədə çərşənbə axşamı Trend-ə "Azəriqaz" İB-dən məlumat verilib.
İB-dən deyildiyi kimi, yanvar-iyun aylarında istehlakçılara çatdırılan qazın ümumi həcmindən 1,52 milyard kubmetrdən artıq istehlakçıların əhali qrupunun, qalan 1,1 milyard kubmetr isə digər qrupların payına düşüb.
2014-cü ilin iyun ayı ərzində abonentlərə 167,5 milyon kubmetrə yaxın qaz çatdırılıb ki, bunun 60,35 milyon kubmetri əhali qrupundan olan istehlakçıların, 107,12 milyon kubmetri isə digər abonentlərin payına düşüb.
2014-cü il avqustun 1-nə olan məlumata görə, Azərbaycanda qaz abonentlərinin sayı 1 700 085 nəfər olub. Onların ümumi sayından 718 518 abonent Bakının, 981 567 abonent isə ölkənin digər regionlarının payına düşüb.
