Azərbaycan, Bakı, 15 avqust /Trend, müxbir Emil İsmayılov/
2014-cü ilin yanvar-iyun aylarında Cənubi Qafqaz Boru Kəməri (Bakı-Tbilisi-Ərzurum) üzrə əsaslı xərclər 325 milyon dollar, əməliyyat xərcləri isə 22,4 milyon dollar təşkil edib. Trend-in məlumatına görə, bu barədə BP-nin 2014-cü ilin I yarısı üzrə hesabatında deyilir.
Cənubi Qafqaz Boru Kəməri genişləndirilməsi ilə əlaqədar 2014-cü ildə əsaslı xərclər 1,25 milyard dollar, 2013-cü ildə isə 250 milyon dollar olacaq.
Cənubi Qafqaz Boru Kəməri genişləndirilməsi layihəsi üzrə yekun investisiya qərarı 17 dekabr 2013-cü il tarixində "Şahdəniz-2" üçün qərar verilməsi ilə eyni zamanda qəbul edilib. Cənubi Qafqaz Boru Kəməri genişləndirilməsi ilə "Şahdəniz 2"-nin işlənməsinin dəyəri 28 milyard dollar qiymətləndirilir.
Hesabatda deyilir ki, Cənubi Qafqaz Boru Kəməri genişləndirilməsi çərçivəsində boruların ilk partiyasının çatdırılması 2014-cü ilin sonunadək planlaşdırılır. Cənubi Qafqaz Boru Kəməri üzrə 2014-cü ildə planlaşdırılan əməliyyat xərcləri 50 milyon dollar təşkil edir ki, bu da 2013-cü ilin göstəricisilə eynidir.
Bakı-Tbilisi-Ərzurum (CQBK) boru kəmərinin uzunluğu 700 kilometrdən çoxdur. Bu boru kəməri ilə Xəzərin Azərbaycan sektorundakı "Şahdəniz" qaz-kondensat yatağında hasil edilən qaz nəql edilir. Qaz Gürcüstan və Türkiyəyə tədarük olunur. Azərbaycan da qaz alıcısı qismində çıxış edir.
Cənubi Qafqaz Boru Kəməri şirkətinin sərmayədarları bunlardır: BP (texniki operator - 28,8%), ARDNŞ (16,7%), Statoyl (15,5%), Total (10%), LUKOYL (10%), NİKO (10%), və TPAO (9%). Bu faizlərə Statoyldan müvafiq olaraq BP və ARDNŞ-nin aldığı iştirak payları daxildir. Total Şahdənizdəki 10% iştirak payını TPAO-ya satmağa razılaşıb, hazırda hər iki şirkət bu əməliyyatı yekunlaşdırmaq üzrədir.
