Azərbaycan, Bakı, 10 sentyabr /Trend, müxbir Emil İsmayılov/
Trans Anadolu qaz kəməri layihəsi (TANAP) 2026-cı ilədək 31 milyard kubmetrlik maksimal layihə gücünə çıxacaq.
Trend xəbər verir ki, bu barədə çərşənbə günü Bakıda "Xəzər Şelfi" Beynəlxalq Konfransında ARDNŞ-nin (Azərbaycan Respublikası Dövlət Neft Şirkəti) birinci vitse-prezidenti Xoşbəxt Yusifzadə bildirib.
Onun sözlərinə görə, ildə 16 milyard kubmetr buraxılış qabiliyyətinə malik boru kəmərinin 2018-ci ilin ortalarında istismara verilməsi planlaşdırılır, 2023-cü ilədək isə qaz kəmərinin buraxılış qabiliyyəti 23 milyard kubmetrə çatdırılacaq.
X.Yusifzadənin sözlərinə görə, Trans Adriatik qaz kəməri layihəsinin (TAP) 2019-cu ildə istimara verilməsi planlaşdırılır.
TAP layihəsi Xəzər regionundan qazı Yunanıstan, Albaniya və Adriatik dənizi vasitəsilə İtaliyanın cənubuna, sonra isə Qərbi Avropaya nəql etməyi nəzərdə tutur. Boru kəmərinin ümumi uzunluğutəxminən 870 kilometr təşkil edəcək.
