Azərbaycan, Bakı, 27 iyul /Trend, müxbir Maksim Tsurkov/
Xəzərin Azərbaycan sektorundakı "Şahdəniz" qaz-kondensat yatağında işlər üçün istifadə edilən "İstiqlal" üzən qazma qurğusunda tikinti işləri başlayıb. Bunu Trend-ə Azərbaycanın neft-qaz bazarındakı mənbə deyib.
Onun sözlərinə görə, qurğunun plan üzrə təmiri Bakının "Caspian Shipyard" Gəmiqayırma Zavodunda həyata keçiriləcək.
Mənbə qeyd edib ki, "İstiqlal" "Caspian Shipyard"a gəlib: "Təmir işləri artıq başlayıb. Plana əsasən, platformanın modernləşdirilməsi prosesi 8-10 ayadək vaxt aparacaq".
O əlavə edib ki, eyni zamanda "Baku Shipyard" gəmiqayırma zavodunda "Dədə Qorqud" qurğusunun təmiri davam edir: "İki qurğunun paralel təmiri ümumi iş prosesinə və hasilat həcminə təsir etməyəcək. Çünki bu işlər plana əsasən aparılır".