Azərbaycan Naxçıvan Muxtar Respublikasının (NMR) qaz təchizatının bərpa edilməsi çərçivsəində qaz tədarükünə başlanılmasına hazır olması barədə İranı rəsmi məktubla xəbərdar edib.Bu barədə sentyabrın 27-də Azəriqaz QSC sədrinin müavini Nazim Səmədzadə Trend ə bildirib.
Onun sözlərinə görə, sentyabrın 29-30-da Azərbaycan-İran sərhədində Astara şəhərinin yaxınlığında Azərbaycan qazının İrana verilməsi baş tutacaq.Müqaviləyə əsasən, ilkin mərhələdə qaz tədarükünün həcmi 52 mln.m3, 2006-cı ildə 250 mln. m3, 2007-ci ildə isə bu həcm 350 mln. m3-dək artırılacaq. Qaz həmin həcmdə NMR-nin təchizatı üçün Azərbaycana qaytarılacaq.
Qaz tədarükü üçün Azərbaycan-İran sərhədində, Astara şəhəri yaxınlığında qaz-kompressor stansiyası (QKS) tikilib.Ölkə prezidenti İ.Əliyevin də iştirak etdiyi QKS-nin açılışı sentyabrın 8-də keçirilib.İran ilə sazişə əsasən, Azərbaycan qazı 55 atmosfer təzyiqi altında tədarük etməlidir.
QKS-nın tikintisini Sum maşınqayırma QHT (Ukrayna) aparıb.Müqavilənin dəyəri 80 mlrd. manat (təxminən $17,5 mln.) təşkil edir.