Azərbaycanın Dövlət Neft Şirkəti (ARDNŞ) bir sıra quru yataqlardakı öz layihələrinin sərbəst maliyyələşdirilməyə hazırlaşır. ARDNŞ-dən Trend ə verilən məlumata görə, bu məqsədlə bu il 3 törəmə şirkət- Salyanneft, Əlibayramlineft və Gobustanneft yaradılıb.
ARDNŞ-in nümayəndəsinin sözlərinə görə, gəlir nefti çərçivəsində müvafiq layihələr belə şirkətlərin yaradılmasına imkan verir. "Əvvəllər gəlir nefti çıxarılana qədər ARDNŞ-in payını layihə üzrə xarici şirkətlər maliyyələşdirirdi. Lakin belə neftin hasilatına başlamaqla ARDNŞ öz payını özü maliyyələşdirməlidir və buna görə də belə şirkətlər yaranıb", - deyə ARDNŞ-dən bildiriblər.
Qeyd edək ki, ARDNŞ-də analoji törəmə şirkətlər "Şahdəniz", BTC, SCP və digər kimi layihələrdə mövcuddur.
ARDNŞ-dən bildirilib ki, Dövlət Neft Şirkətinin yaratdığı törəmə şirkətlər çərçivəsində ayrıca ştat fəaliyyət göstərəcək. "Belə ki, ARDNŞ-dən bu şirkətlərdə icraçı direktorlar, eləcə də şirkətin özünün ştatı təyin edilir. PSA müqavilələri imzalanan zaman sənədlər xarici təsisçilər və ARDNŞ törəmə şirkətləri tərəfindən imzalanır. Hərçənd ki, onlar həmin anda ayrılıqda faktiki olaraq mövcud olmurlar. İndi Azərbaycanın bütün əməliyyat şirkətlərində ayrıca strukturlar təmsil olunacaq", - deyə ARDNŞ-dən bildiriblər.
ARDNŞ yaxın gələcəkdə bütün quru layüihələrində bu tip şirkətlərin yaradılacağını ehtimal edir.
