Azərbaycan Dövlət Neft Şirkəti (AR DNŞ) 2006-cı ilin fevralında Novorossiysk limanından 60 min ton Urals növlü neftin satışı üzrə tenderi bağlı elan edib. Bu barədə Trend ə AR DNŞ-dən məlumat verilib. Tenderin qalibi Glencore Energy UK LTD neft treyderidir.
"Partiyanın fevralın 26-27-də Novorossiysk terminalının N6 və ya N7 körpüsündən yüklənməsi gözlənilir", - deyə AR DNŞ-dən bildirilib.
2005-ci ildə AR DNŞ Novorossiysk limanından 1,631 mln ton neft yükləyib. Bu göstərici 2004-cü ildə 2,559 mln ton təşkil edib. Noyabrda və 2004-cü ilin dekabrında yüklənmiş 167,2 min ton və 166,3 min tona qarşı 2005-ci ilin dekabrında 86,5 min ton neft yüklənib. 2006-cı ilin yanvarında limandan neft yüklənməyib.
2005-ci ildə bütün şirkətlər arasında Glencore treyderi AR DNŞ-in elan etdiyi tenderlərdə Novorossiyskdən 557 min ton neft alıb. İkinci yerdə 464 min tonla LUKOİL şirkətidir.
2006-cı ilin əvvəlindən AR DNŞ-dən aşağıdakı şirkətlər neft alıb:
Yanvar - Glencore Energy (85 min ton);
Fevral - Taurus Petroleum (140 min ton);
Fevral - Glencore Energy (60 min ton).
