Azərbaycan Dövlət Neft Şirkəti (AR DNŞ) 2007-ci il iyulun 1-nə beynəlxalq standartlara uyğun mühasibat uçotunun aparılması və maliyyə hesabatının təqdim olunması prosesinə hazırlaşmalıdır. Bu barədə Trend ə AR DNŞ-dən bildirilib. Digər ictimai əhəmiyyətli təşkilatlardan fərqli olaraq belə müddət yalnız AR DNŞ üçün müəyyən olunub. Hazırda şirkət əməkdaşları üçün mühasibat uçotu sahəsində mühasibat hesabatının milli standartlarına uyğun olaraq treninqlər keçirilir. Bu standartlar Maliyyə nazirliyi tərəfindən mühasibat uçotunun beynəlxalq standartlarına uyğun hazırlanıb. Dünya bankının texniki dəstəyi çərçivəsində, həmçinin, AR DNŞ-in mühasiblərinə yardım göstərilir.
Şirkətin beynəlxalq standartlara uyğun hesabat hazırlaması onun hər il beynəlxalq auditdən keçməyəcəyi demək deyil. AR DNŞ və onun maliyyə-təsərrüfat fəaliyyətinin tanınmış auditor şirkətləri tərəfindən yoxlanılmasında təkid edən BMİ buna ehtiyac görmür. Xüsusilə bu tələb "Şah-Dəniz" yatağının işlənib hazırlanması layihəsi çərçivəsində AYİB tərəfindən irəli sürülmüşdü.
Nazirlər Kabinetinin təsdiq etdiyi siyahıya əsasən, 20 ictimai əhəmiyyətli təşkilat 2008-ci il yanvarın 1-dək maliyyə hesabatının beynəlxalq standartları əsasında mühasibat uçotu aparmalı və maliyyə hesabatını təqdim etməlidir. Bu siyahıya AR DNŞ, "Azərenerji", "Barmek-Azərbaycan", "Azərsel" BM, "Azneft" İB, H.Əliyev adına neft emalı zavodları və "Azneftyağ", ADDYİ, Bakı metropoliteni, "AzAL" DK və onun Milli aviasiya şirkəti, XDGİ, "Azəriqaz", "Azəriqaznəql", "Azərsu", "Aztelekom" İB, "Azərkimya" DŞ və onun tərkibinə daxil olan etilen-polietilen zavodu daxildir.