Qəbələdə bir sıra sahələrdə fəaliyyət göstərən həmkarlar ittifaqı rəhbərlərinin iştirakı ilə seminar keçiriləcək. Bu barədə Trend ə Azərbaycanın neft-qaz sənayesi işçilərinin respublika həmkarlar ittifaqı Komitəsində (NQSRHİK) bildirilib.
Seminar iki hissədən ibarət olacaq: tədbirin birinci hissəsi martın 28-dən aprelin 1-dək, ikinci hissəsi isə aprelin 3-dən 7-dək keçiriləcək.
"Komitə seminarda kimya, mədənçıxarma sənayesi, energetika və digər sahələrin həmkarlar ittifaqı işçilərinin Beynəlxalq Federasiyasının ICEM (International Federation of Chemical, Energy, Mine and General Workers' Unions) üzvü kimi iştirak edəcək" -deyə qurumda bildirilib.
Seminar beş qlobal həmkarlar ittifaqı federasiyasının, o cümlədən ICEM-in yeni "Gələcəyə hazırlıq" birgə layihəsinə həsr olunub.
Seminarda NQSRHİK rəhbəri Cahangir Əliyev, layihənin əlaqələndiricisi Vsevolod Barbanəqra və rabitə, energetika, kimya, sənaye, nəqliyyat və digər sahələrin həmkarlar ittifaqı komitələrinin bir sıra nümayəndələrinin çıxışları gözlənilir.
Tədbirin keçirilməsində əsas məqsəd müxtəlif sahələrdə fəaliyyət göstərən həmkarlar ittifaqı orqanları arasında münasibətlərin və əməkdaşlığın inkişaf etdirilməsidir.
Azərbaycan 1999-cu ildən ICEM-in üzvüdür.