Türkmənistan və Azərbaycan arasında Transxəzər qaz kəmərinin inşası ən azı $5 mlrd-a başa gələ bilər. Burada Azərbaycanda mövcud infrastruktur - Cənubi Qafqaz qaz kəməri də nəzərə alınıb. 1996-cı ildə Transxəzər qaz kəməri layihəsi $2,5 mlrd dəyərində qiymətləndirilirdi. Trend in xəbər verdiyi kimi, bu bardə martın 28-də sənaye və energetika naziri Natiq Əliyev məlumat verib.
Onun sözlərinə görə, Azərbaycan bu layihədə sərmayəçi qismində iştirak etməməlidir. "Bu, Türkmənistanın və Avropa bazarına qaz ixrac etmək istəyən şirkətlərin işidir", - deyə o bildirib.
N.Əliyev qeyd edib ki, Azərbaycan və Türkmənistan ümumi sərhədlərə malikdir və buna görə də ölkələr qaz kəmərinin inşası layihəsi ilə bağlı məsələni ikitərəfli əsasda həll etmək hüququna malikdir. "Bu boru kəmərinin inşasını ekoloji təhlükə ilə əlaqələndirirlər. Belə olan halda nə üçün daha aqressiv mühitin olduğu Qara dənizdən boru kəməri çəkmək olar, Xəzərdən isə yox?", - deyə nazir sual verib.
Bu gün Avropa alternativ qazın tədarükündə maraqlıdır. Kiçik Asiyadan Avropaya qazın tədarükü ilə bağlı bir sıra layihələr var. İlk növbədə, İran, Türkmənistan və Qazaxıstandan qaz tədarükü nəzərdə tutulur. Avropaya təbii qazın tədarükü üzrə bir sıra alternativ marşrutlar mövcuddur. Bu marşrutlardan biri İran və Türkiyə, digəri isə Xəzər vasitəsilə Azərbaycan və Gürcüstandan Türkiyə və Avropaya tədarükdür", - deyə N.Əliyev qeyd edib.
Nazirin sözlərinə görə, son vaxtlar Transxəzər qaz kəmərinə maraq xeyli artıb. Bu layihənin təşəbbüsçüsü vaxtilə Türkmənistan olub. Türkiyə və Türkmənistan arasında qaz kəmərinin 30 mlrd m3 -dək genişləndirilməsi və daha sonra Avropaya 14 mlrd m3 qazın satılması şərti ilə ildə 16 mlrd m3 təbii qazın satılmasına dair saziş imzalanıb.
N.Əliyev bildirib ki, Türkiyənin energetika naziri Hilmi Gülərin Türkmənistana səfəri zamanı onunla keçirilmiş görüşlərlə əlaqədar son vaxtlar layihə diqqəti daha da cəlb edir. Bu boru kəməri region və xüsusilə Türkmənistana lazımdır. Nazir bildirib ki, onda olan məlumata görə, türkiyəli nazirin Türkmənistan prezidenti Saparmurad Niyazovla görüşü zamanı bu layihənin reabilitasiyasına başlanması ilə bağlı məsələ müzakirə olunub.
N.Əliyev qeyd edib ki, Mərkəzi Avropa ölkələri bu layihənin gerçəkləşdirilməsində maraqlıdır. Avstriya, Türkiyə, Bolqarıstan, Rumıniya və Macarıstan "NABUCCO" layihəsinin həyata keçirilməsinə dair saziş imzalayıb. Layihədə 3200 km uzunluğunda və 30 mlrd m3 daşıma gücünə malik qaz kəmərinin inşası nəzərdə tutulur. Bu ilin sentyabrında istismara veriləcək Cənubi Qafqaz qaz kəmərini bu layihənin birinci hissəsi hesab etmək olar, - deyə nazir vurğulayıb.
Onun sözlərinə görə, son vaxtlar Avropanın qazla təmin edilməsi ilə bağlı danışıqlar fəallaşıb. "Avropa başa düşüb ki, təkcə Rusiya qazına ümid etmək sadəlövhlükdür, çünki Rusiya, son bir neçə ayda ölkədəki monopolizmlə bağlı bəyanat verib. Rusiya bəyan edib ki, təbii qazın qiyməti artmaqda davam edəcək", - N.Əliyev bildirib. Buna görə də Avropa yeni və alternativ qaz, o cümlədən elektrik enerji alternativləri axtarır. Bu gün Asiya-Avropa vahid elektrik enerji sisteminin yaradılması ideyası irəli sürülür.
