BOS Shelf Azərbaycan yataqlarının işlənib hazırlanması üzrə gələcək layihələrdə iştirakda maraqlıdır. Bu barədə Trend ə BOS Shelf şirkətinin baş direktoru Riçard Maki məlumat verib. O qeyd edib ki, şirkətin "Şahdəniz" yatağının işlənib hazırlanmasının ikinci mərhələsi üzrə layihədə iştirakı BP-nin seçdiyi inkişaf strategiyasından asılı olacaq.
BOS Shelf Azərbaycan üçün iş görməklə yanaşı, ixracla bağlı sifarişlərin yerinə yetirilməsi potensialı üçün "Heydər Əliyev adına Bakı Dərin Özüllər" zavodunda "2 saylı stapel"i yenidən quraşdırıb.
"Məqsədimiz müxtəlif bazarlarda işlə maksimal təminatı saxlamağa çalışmaqdır", - deyə R.Maki qeyd edib.
Layihələri həyata keçirmək üçün Azərbaycanda əlavə infrastrukturun qurulması potensial müştərilərin seçdiyi inkişaf strategiyasından asılı olacaq. "Biz BOS Shelf-ə rəqabətdə üstünlük qazanmağa imkan verən novator qərarlar axtarışındayıq", - deyə baş direktor vurğulayıb.
Hazırda şirkətin BDÖZ-də tikinti sahəsi var. Burada "Azəri-Çıraq-Günəşli" yatağının işlənib hazırlanması layihəsi çərçivəsində platformalar üçün dayaq blokları quraşdırılır.