Eurasia Energy elan edib ki, dəniz bloku üzrə PSA tipli müqavilənin imzalanması üçün 2006-cı ilin noyabr ayında Azərbaycan Dövlət Neft Şirkəti (ARDNŞ) ilə danışıqlara başlamağa hazırlaşır. Trend xəbər verir ki, bu barədə Eurasia Energy-nin məlumatında qeyd olunub.
Dəniz blokuna "Ələt-Dəniz", "Hamamdağ-Dəniz", "Qarasu", "Sangi-Muğan", "Ülfət", "Aran-Dəniz", "Daşlı" və "Səbayıl" yataqları daxildir. Blok dayaz sahil sularında Bakının təxminən 70 kilometrliyində yerləşir.
Sənəddə qeyd olunub ki, aprel ayında ARDNŞ "Ələt-Dəniz" yatağında (Bloka daxil olan) Ələt № 87 yeni istismar quyusunun qazıntısını tamamlayıb. ARDNŞ elan edib ki, quyu 3610 metr dərinliyində qazılıb və oradakı hasilat iyulun 7-də başlayıb. Quyudan sutkalıq neft hasilatı 40 ton neft (təxminən 300 barel) və 95 min m3 qaz təşkil edir.
Eurasia Energy Limited bu layihə çərçivəsində neft injinirinqi üzrə məsləhətçi qismində TRACS İnternational Consultancy Ltd. şirkətini cəlb edib. Məlumatda qeyd olunub ki, Azərbaycan Dövlət Neft Şirkəti tərəfindən Blok üzrə təqdim olunmuş geoloji-geofiziki materiallar layihənin iqtisadi tərkibinin qiymətləndirilməsi məqsədi ilə öyrənilməsi üçün may ayında TRACS şirkətinin Şotlandiyadakı ofisinə təqdim edilib.
Blokdakı suyun dərinliyi əsasən 20 metr təşkil edir və strukturun sonunda maksimal olaraq 50 metr səviyyəyə çatır. "Ələt-Dəniz" 1983-cü ildə açılıb və indiyədək burada 12,5 mln. barel neft və 1 mlrd. m3 qaz hasil edilib. ARDNŞ-in məlumatına görə, "Ələt-Dəniz"də qalan neft ehtiyatları 14 mln. barel neft və 1 mlrd. m3 qaz təşkil edir. Əsas məhsuldar qatlar 3700-4500 metr dərinliyindədir.