Noyabr ayında Azərbaycan Dövlət Neft Şirkəti (ARDNŞ) Türkiyənin Ceyhan limanından ümumi həcmi 350 min ton (2 mln. 600 min barel) olan üç yüngül neft partiyası göndərəcək. Bu barədə Trend ə ARDNŞ-dən məlumat verilib.
Neft Bakı-Tbilisi-Ceyhan (BTC) boru kəməri ilə çatdırılacaq.
80 min ton (600 min barel) həcmli ilk neft partiyasının Ceyhandan noyabrın 3-5-də, 135 min ton (1 mln. barel) həcmli ikinci partiyanın - noyabrın 11-13-də, 135 min ton həcmli üçüncü partiyanın isə noyabrın 24-26-da göndərilməsi nəzərdə tutulub.
ARDNŞ-dən bildiriblər ki, noyabrın 24-26-da göndəriləcək 135 min ton neftin satışı üçün tender adi qaydada elan olunacaq, digər partiyalar isə əvvəllər bağlanmış uzunmüddətli müqavilələr üzrə satılacaq.
BTC boru kəməri üzrə 2006-cı ilin yanvar-sentyabr aylarında 3 mln. 519,9 min ton neft - 32 tanker partiyası ixrac olunub. Sentyabr ayında BTC boru kəməri ilə 1 mln. 146 min ton neft - 8 tanker partiyası ixrac olunub.
