Azərbaycan Dövlət Neft Şirkətinin maliyyə imkanlarının yaxşılaşması ilə əlaqədar gələn il kəşfiyyat işlərinin həcminin artırılması gözlənilir. İlk növbədə, ARDNŞ "Bahar-2" perspektiv strukturunda axtarış qazma işlərini həyata keçirmək niyyətindədir. Trend in xəbər verdiyi kimi, bu barədə ARDNŞ-in Neft və Qaz Hasilatı üzrə "Azneft" İstehsalat Birliyinin baş geoloqu Akif Nərimanov məlumat verib.
Onun sözlərinə görə, bu struktur mürəkkəb quruluşa malikdir. Bu günə qədər yataqda karbohidrogen ehtiyatları kəşf edilməyib. "Biz güman edirik ki, orada müəyyən qədər karbohidrogen toplanıb və axtarış qazma işləri vasitəsi ilə biz ona çıxmaq istəyirik. Hal-hazırda bu məsələ müzakirə olunur", - deyə A. Nərimanov qeyd edib.
Adıçəkilən strukturda qazma işlərinə gələn il başlamaq nəzərdə tutulub. Quyunun layihə dərinliyi 5 800 metrə yaxın olacaq.
