Azərbaycan Dövlət Neft Şirkəti quru yataqlarının işlənməsi anından 940 mln. ton neft və 131 mlrd. kub metr qaz hasil edib. ARDNŞ-dən Trend ə verilən xəbərə görə, ehtiyatların 87%-i hasil edilib. "Ehtiyatların təxminən 70%-i 3000 metrə qədər dərinlikdən, 20,8%-i 3000-dən 5000 metrə qədər dərinlikdən, 8,7%-i 5000 metrdən artıq dərinlikdən hasil edilib", - deyə ARDNŞ-dən bildirilib.
Hazırda Azərbaycanın quru hissəsində 39 yataq var. Bunlardan 20-si işlənir.
Proqnozlaşdırılır ki, 3000-dən 5000 metrə qədər dərinlikdə işlənməsi mümkün olan neft ehtiyatlarının həcmi 54,2%, 5000 metrdən artıq dərinlikdə isə - 36,7% təşkil edir. "Bu gün yataqların sulaşması 87%-dən 98% arasında dəyişir", - deyə ARDNŞ-dən bildirilib.
ARDNŞ-də qeyd ediblər ki, bu gün 364 obyekt quyuların sərbəst şəbəkəsi ilə işlənir. Orada cəmi 52700 quyu yerləşir. 96 obyektin istismar fondu yoxdur. Onların işlənməyə cəlb olunması üçün 3250 quyunu bərpa etmək lazımdır. 117 obyektdə 218 quyu (hər obyektdə 1-4 quyu) işləyir.
Balans ehtiyatlarının təxminən 60%-i, hasilatın isə 70%-i Abşeron yarımadasının payına düşür. Yarımadadakı yataqlar 1871-1940-cı illərdə istismara verilib. 273 neft - qaz obyektində təxminən 25 min quyu qazılıb.
