Rusiyanın "LUKOYL" ASC Bakı-Tbilisi-Ceyhan (BTC) boru kəməri ilə neft nəqlinə qoşulma məsələsində heç bir siyasi qərəzə malik deyil. Bu barədə bu gün Moskvada "LUKOYL" ASC-nin direktorlar şurasının sədri Valeri Qreyfer Trend in xüsusi müxbirinə eksklüziv olaraq məlumat verib.
"Əlbəttə, əgər bir tonun bir kilometr nəqli üçün normal qiymət olarsa, o zaman biz ora gedəcək və öz neftimizi nəql edəcəyik", - deyə o bildirib.
"LUKOYL"un direktorlar şurasının sədri şirkətin Azərbaycanla əməkdaşlıq səviyyəsindən razıdır.
"Bu münasibətlərdə qarşılıqlı maraq xətti dəqiq görünməlidir. Və şirkətimizin Azərbaycana qarşı və ölkənin şirkətimizə qarşı yaxşı münasibətinin olmasına baxmayaraq, bazarın sərt qanunları bütün bu münasibətlərin xarakterini diktə edir", - deyə Valeri Qreyfer bildirib.
O qeyd edib ki, şirkətin Xəzər bölgəsində başlıca inkişaf istiqaməti məhz onun şimal hissəsi olacaq.
"Bizdə Şimali Xəzərdə səmərəliliyinə və ehtiyatlarına görə müstəsna yataqlar kəşf olunub. Ona görə də Xəzərdə görülən işlər haqqında danışsaq, ilk növbədə, bizim işlərimiz və ehtiyatlarımız Şimali Xəzərdə cəmlənəcək. Bu, yəqin ki, "LUKoyl" üçün bu bölgədə başlıca istiqamətdir", - deyə o bildirib.
