Azərbaycan, Bakı/ Trend / Birinci rübdə Bakı-Novorossiysk kəməri vasitəsilə 876,3 min ton neft ixrac olunub. Bu barədə Azərbaycan Dövlət Gömrük Komitəsinin məlumatında göstərilib. Bu dövr ərzində Bakı-Tbilisi-Ceyhan (BTC) kəməri ilə 5,8 mln. ton neft ixrac olunub.
İlin əvvəlindən etibarən Bakı-Supsa kəmərində aparılan təmir işləri ilə əlaqədar ixrac həyata keçirilməyib. Birinci rüb ərzində dəmir yolu ilə göndərilmiş neftin həcmi isə 1,6 mln. dolar təşkil edib.
Bakı-Novorossiysk kəməri ilə ilin əvvəlindən əsasən "Azəri-Çıraq-Günəşli" yatağından hasil olunan Azərbaycan Beynəlxalq Əməliyyat Şirkətinin (ABƏŞ) nefti ixrac olunub. Rusiyadan qaz idxalının dayandırılması və ölkənin mazut rejiminə keçməsi ilə əlaqədar, Azərbaycan Dövlət Neft Şirkəti 2006-cı ilin yanvar-mart ayları ilə müqayisədə neft ixracını əhəmiyyətli dərəcədə azaldaraq təqribən hər ay 60 min ton neft ixrac edib. Əvvəllər Rusiyadan idxal olunan qazın əvəzində hazırda istifadə olunan mazut istehsalı üçün Bakı NEZ-ə daha çox neft verilir.
