Azərbaycan, Bakı/ Trend müxbir S.Əliyev/ Bu il Türkiyəyə "Şahdəniz" yatağından 2,8 mlrd. kubmetr qaz tədarük olunması planlaşdırılır. Bu barədə çərşənbə axşamı mətbuat konfransında Azərbaycan Dövlət Neft Şirkətinin prezidenti Rövnəq Abdullayev bildirib.
Onun sözlərinə görə, həcmin son miqdarı ilin yekunlarına əsasən müəyyən olunacaq, çünki Türkiyə Azərbaycandan qaz idxalında ləngiyib. Hazırda "Şahdəniz" yatağında sutkalıq 20 mln. kubmetr potensiala malik olan üç quyu fəaliyyətdədir.
İyulun 1-nə olan məlumatlara əsasən, "Şahdəniz" yatağından 700 mln. kubmetrdən çox qaz hasil olunub. Bu həcmin 538,7 mln. kubmetri Azərbaycana, 101 mln. kubmetri Gürcüstana, 44,2 mln. kubmetri isə BTC Co boru kəməri şirkətinə verilib. Şirkət Bakı-Tiflis-Ceyhan kəmərinin nasos stansiyalarında yanacaq qismində qazdan istifadə edir.
