Azərbaycan, Bakı / Trend / "Azərenerji" SC-nin mətbuat xidmətindən bazar ertəsi verilən məlumata görə, yaxın zamanlarda SC 220 kilovoltluq "Müşfiq" yarımstansiyasının bərpasına başlamaq niyyətindədir. Yarımstansiyada 200-250 MVA gücündə avtotransformatorlar, rele müdafiəsi panelləri və idarəetmə kabelləri dəyişdiriləcək.
Bu layihə Yaponiyanın beynəlxalq yardım agentliyinin qrantı hesabına reallaşacaq. Avtotransformatorlardan biri artıq Yaponiyada sınaqdan keçirilib və tezliklə Azərbaycana göndəriləcək. 220 kilovoltluq yarımstansiya istismara 1986-cı ildə verilib. "Müşfiq" stansiyasının bərpa işlərindən sonra Səbail, Yasamal və Nəsimi rayonlarının enerji təminatı yaxşılaşdırılacaq.
