Azərbaycan, Bakı / Trend müxbir S.Babayeva/ Azərbaycanın İnternet Cəmiyyətinin rəhbəri, "Azerin" provayder şirkətinin baş direktoru Qalib Qurbanovun çərşənbə günü verdiyi məlumata görə, özündə 46 fiziki və hüquqi şəxsi birləşdirən İnternet Cəmiyyəti Rabitə və İnformasiya Texnologiyaları Nazirliyinə bir sıra tariflərin aşağı salınması ilə bağlı təklif göndərib.
"Təklif zərfi altı maddədən ibarətdir, maddələrdə genişzolaqlı internetin inkişafı məqsədilə internet-provayderlər üçün internet tariflərinin aşağı salınması yer alıb" - deyə Qurbanov qeyd edib.
Cəmiyyətin təkliflərindən biri də provayderlərə genişzolaqlı internetin təqdim edilməsi zamanı ATS-dən keçən kanalların sürətinin artırılmasından ibarətdir.
"Hazırda kanalın sürəti 2 Mb/s təşkil edir, bu rəqəmi 10-15 Mb/s-yə qədər artırmaq daha səmərəli olardı" - deyə Qurbanov bildirib.
Provayderlərin digər bir təklifi 2 Mb/s kanallarının dəyərinin azaldılması olub. Cəmiyyətin rəhbərinin sözlərinə görə, kanalın çəkilməsinin dəyəri hazırda 1,2 min manat, aylıq istismar isə 320 manat təşkil edir.
"Bu rəqəmlər üç-dörd dəfədən az olmayaraq aşağı salınmalıdır" - deyə Qurbanov hesab edir.
Azərbaycan Rabitə Nazirliyinin bu məsələlər üzrə nümayəndəsi ilə təcili şərhlər almaq üçün əlaqə yaratmaq mümkün olmayıb.
Rabitə nazirinin müavini İltimas Məmmədovun bundan öncə verdiyi məlumata görə, ölkədə internet tarifləri 25-30% aşağı salına bilər.
