Azərbaycan, Bakı, 22 aprel/ Trend / Azərbaycanın öz rabitə peykini buraxması (AzerSat layihəsi) ölkədə rabitə xidmətlərinin qiymətinin azalmasına gətirə bilər. Rabitə və informasiya texnologiyaları nazirinin müavini Elmir Vəlizadə belə hesab edir.
"Bununla eyni zamanda, peyk rabitə, İnternet xidmətlərinin keyfiyyətini artırmağa imkan verəcək" - nazir müavini bildirib.
Vəlizadənin rəyinə görə, AzerSat layihəsi Azərbaycanın digər rabitə peyklərindən asılılığını zəiflədəcək və yüksəksürətli İnternetin və multimedia xidmətlərinin tətbiqi mümkün olacaq.
Rabitə nazirliyi artıq bir ildən sonra milli rabitə peykinin buraxılması layihəsinin reallaşdırılması üzrə tədqiqatlar aparır. İşlər iki istiqamətdə aparılır - orbital mövqeyin əldə edilməsi üzrə danışıqlar və peykin hazırlanmasına dair şirkətlərin təkliflərinin öyrənilməsi. Peykin istehsalı ən azı 24 ay çəkə bilər.
"Əgər bu il yekun qərar qəbul etmək mümkün olsa, o zaman artıq 2010-cu ildə peyk buraxıla bilər" - nazir müavini bildirib.
Layihənin maliyyələşdirilməsi əvvəlcə dövlət hesabına həyata keçiriləcək. Sonra isə o öz xərcini ödəyə biləcək. Peykin ehtiyatlarının 25-30 faizi Azərbaycan tərəfindən istifadə ediləcək. Qalan hissəsini isə peykin əhatə dairəsinə daxil olacaq ölkələrə satmaq planlaşdırılır. AzerSat layihəsi $80-100 mln. qiymətləndirilir. Peykin əhatə dairəsinə Avropa, və Asiyanın bir hissəsi - Qazaxıstan, Türkmənistan, İran daxil olacaq.
