Azərbaycan, Bakı, 12 may / Trend , müxbir S.Babayeva/ Azərbaycanın Rabitə və İnformasiya Texnologiyaları Nazirliyindən bazar ertəsi alınan məlumata görə, yanvar-aprel aylarında nazirlik altı mindən çox ailəni telefonla təmin edib.
Bu vaxt ərzində istismar edilən telefon nömrələrinin sayı 6476 ədəd təşkil edib. Bütün nömrələr Aztelekom İB-nin payına düşür.
Aztelekom İB Bakı və bütün respublikanı (Naxçıvan Muxtar Respublikası istisna olmaqla) telefon, həmçinin, beynəlxalq və rayonlararası rabitə ilə təmin edir. İB 54 telekommunikasiya müəssisəsilə bərabər, Bakı şəhərlərarası telefon qovşağı, kabel magistralının Texniki qovşağı və təmir-tikinti idarəsini birləşdirir.
Yerli, şəhərlərarası və beynəlxalq rabitə, anoloji rəqəmli və geniş xətli kanalların icarəsi, 107 kod ilə sifarişli danışıqlar, AZTELEKOM.NET (internet-provayder xidmətləri), taksofon danışıqları (yerli, beynəlxalq və şəhərlərarası), CDMA standartlı mobil rabitə və s. Aztelekom İB-nin əsas xidmətləri sahəsinə daxildir.
Hökümətin ehtimalına görə, Azərbaycanda 2011-ci ilədək telefon aparatlarının sayı hər 100 nəfərə 19,8 ədəd artacaq. Hazırda bu rəqəm 15 -dir.
