Azərbaycan, Bakı, 22 iyul/ Trend , müxbir S.Babayeva/ Azərbaycan Rabitə və İnformasiya Texnologiyaları Nazirliyinin nümayəndə heyəti Ümumdünya Poçt İttifaqının (ÜPİ) (Universal Postal Union - UPU) iyulun 23-dən avqustun 12-dək keçiriləcək XXIV Konqresində iştirak etmək üçün bu gün Cenevrəyə yola düşür, - çərşənbə axşamı nazirlikdən bildirblər.
"Nümayəndə heyətinə nazir müavini İltimas Məmmədov başçılıq edəcək", - nazirlikdən deyiblər.
Konqres dörd ildən bir keçirilir. Konqresin Keniyanın paytaxtı Nayrobidə keçirilməsi nəzərdə tutulsa da, bu ölkədə keçən ilin dekabrında prezident seçkilərindən sonra yaranan qarışıqlıqla əlaqədar, ÜPİ-nin Inzibati Şurası Konqresin İveçrəyə keçirilməsi barədə qərar qəbul etdi. XXIV Konqres Nayrobi Konqresi (2008) adlandırılsa da, İnzibati Şuraya növbəti dörd ildə Keniya sədrlik edəcək.
Konqresin gedişi zamanı ÜPİ-nin ali orqanlarına - İnzibati Şuraya və Poçt Istifadəsi Şurasına seçkilər keçiriləcək.
Azərbaycan bu seçkilərdə iştirak etmək üçün namizədliyini irəli sürüb.
Sonuncu Buxarest Konqresində (2004) bu il üzvlüyü başa çatan Azərbaycan, dörd il müddətinə İnzibati Şuranın tərkibinə qəbul edilib.
Konqresin gedişində iştirakçılar poçt xidmətlərinin keyfiyyətinin yaxşılaşdırılmasına, dünya poçt infrastrukturnun inkişafına, xidmət çeşidlərinin, o cümlədən müasir informasiya texnologiyaları nəzərə alınmaqla, poçt idarələrinin təqdim etdiyi maliyyə çeşidlərinin genişləndirilməsinə istiqamətlənmiş məsələləri müzakirə edəcəklər.
konqresdə Ümumdünya poçt strategiyasının - ÜPİ-nin və bütün poçt bazarının iştirakçılarının öz işində rəhbər tutacağı əsas sənədin qəbul edilməsi planalşdırılır.