Azərbaycan, Bakı, 06 avqust / Trend , müxbir S.Babayeva/ 2011-ci ildə Azərbaycan iki rabitə peykinə sahib ola bilər. Bu barədə Nazirlər Kabinetinin prezident İlham Əliyevin sədrliyi ilə keçirilən və 2008-ci ilin I yarısında sosial-iqtisadi inkişafın yekunlarına həsr olunmuş iclasında ölkənin rabitə və informasiya texnologiyaları naziri Əli Abbasov bildirib.
Onun sözlərinə görə, iki peykin buraxılması üzrə TİƏ və müqavilələr hazırlanıb.
"Hər iki layihə kommersiya tipli və gəlirlidir, onlar Azərbaycanın beynəlxalq kosmik bazara çıxışını təmin edəcək", - deyə nazir bildirib.
Abbasov qeyd edib ki, sentyabr-oktyabr aylarından gec olmamaqla layihələrin reallaşdırılmasına başlanacağı təqdirdə, 2010-cu ildə ilk, 2011-ci ildə isə ikinci peykin buraxılışı mümkün ola bilər.
Rabitə peykinin buraxılması üzrə layihənin dəyəri 80-100 mln. dollar qiymətləndirilir. Birinci peykin əhatə zonasına təxminən Avropa və Asiyanın bir hissəsi - Qazaxıstan, Türkmənistan, İran daxil olacaq.