Azərbaycan, Bakı, 06 noyabr/ Trend , müxbir İ.Xəlilova/ Rabitə və İnformasiya Texnologiyaları Nazirliyi birinci şəxsi rabitə peykinin buraxılması üçün orbital mövqeyin ayrılmasına dair təklifləri qiymətləndirir, - rabitə nazirinin müavini İltimas Məmmədov cümə axşamı bildirib.
"Bir neçə şirkət öz təkliflərini təqdim edib. Hazırda onların qiymətləndirilməsi gedir", - nazir müavini bildirib.
Azərbaycan prezidenti İlham Əliyev çərşənbə günü ölkədə kosmik sənayenin yaradılması və orbitə telekommunikasiya peyklərinin çıxarlması haqqında sərəncam imzalayıb.
Dövlət başçısının sərəncamında qeyd olunur ki, Azərbaycanın Avropa və Asiya arasında əlverişli coğrafi və iqtisadi məkanda yerləşməsi iqtisadi və informasiya təhlükəsizliyinin əsas komponenti olan telekommunikasiya peyklərinin yaradılması və orbitə çıxarılmasını zəruri edir.
Sərəncama əsasən, ölkədə yüksək texnologiyaların tətbiqi və kosmik sənayenin yaradılmasının sürətləndirilməsi məqsədilə Nazirlər Kabineti üç ay ərzində ölkədə kosmik sənayenin yaradılması və inkişafı üzrə Dövlət Proqramını hazırlamalı və prezidentə təqdim etməlidir.
Rabitə və İnformasiya Texnologiyaları Nazirliyinə telekommunikasiya peyklərinin orbitə çıxarılması üzrə müvafiq tədbirlərin həyata keçirilməsi tapşırılıb.
Müəlliflə əlaqə saxlamaq üçün elektron ünvan: [email protected]