Azərbaycan, Bakı, 21 noyabr/ Trend , müxbir S.Babayeva/ "Cari ilin sonunadək Azərbaycanın Rabitə və İnformasiya Texnologiyaları Nazirliyi Azerpocht Dövlət Müəssisəsi üçün maliyyə xidmətləri göstərilməsi üzrə lisenziya alınması ilə əlaqədar Milli Banka müraciət edəcək", - nazirliyin poçt sektorunun rəhbəri Novruz Məmmədov cümə günü bildirib.
"Hazırda biz "Poçt rabitəsi haqqında" Qanuna qəbul edilmiş düzəlişlərə əsasən, hazırlıq işləri aparırıq. Güman edirəm ki, bununla əlaqədar problem olmayacaq", - Məmmədov əlavə edib.
"Poçt rabitəsi haqqında" Qanuna noyabrın əvvəlində təsdiq edilmiş əlavə və dəyişikliklərə əsasən, Azerpocht-un funksiyalarıpoçt hesablarının açılması və aparılması, pul köçürmələri, maliyyə müəssisələrində, o cümlədən Azərbaycan Milli Bankında müxbir hesablarının açılmasını, poçt əmanətlərinin qəbulunu, ödəmə vasitələrinin, o cümlədən debit və kredit kartlarının, poçt çeklərinin buraxılışını, əcnəbi valyutanın alınmasını, nəqd pulların və digər qiymətli əşyaların inkassasiyasiyasının həyata keçirilməsi kimi maliyyə xidmətləri ilə genişləndirilib.
Lakin bu xidmətlərin göstərilməsi üçün Azərbaycan Milli Bankından lisenziya alınması və müvafiq dövlət rüsumunun ödənilməsi lazımdır.
Məmmədovun sözlərinə görə, Azerpocht DM-ə idarənin bütün poçt şöbələrini əhatə edəcək vahid lisenziya veriləcək.
Rabitə Nazirliyində hesab edirlər ki, Azerpocht 2011-ci ilə, Dünya Bankı ilə birgə realizə edilən və əsas komponenti maliyyə xidmətlərinin göstərilməsi olan "Maliyyə xidmətlərinin inkişafı" layihəsinin yekununda gəlirlə işləyən təşkilat ola bilər.
DM-in strukturuna 59 poçtamt, iki poçt müəssisəi, iki törəmə müəssisə və səkkiz rabitə qovşağı daxildir.
Azerpocht-un strukturunda Azərbaycanın bütün yaşayış məntəqələrini əhatə edən 1,3 min poçt rabitə şöbəsi fəaliyyət göstərir.
Rabitə Nazirliyi cari ilin sonuna və ya 2009-cu ilin əvvəlində maliyyə xidmətlərinin göstərilməsinə başlamaq istəyir.
