Azərbaycan, Bakı, 21 noyabr/ Trend , müxbir S.Babayeva/ "Azərbaycanda Yüksək Texnologiyalar üzrə Tədqiqat Mərkəzinin yaradılması informasiya texnologiyaları sahəsinin dövlət üçün vacibliyinə sübutdur", - Azərbaycanın İnternet Forumu QHT- nin rəhbəri Osman Gündüz cümə günü bildirib.
"Son vaxtlar İT sahəsində islahatlar daha sistemləşdirilmiş aparılır", - Gündüz bildirib. Onun sözlərinə görə, görülən tədbirlər rabitə və informasiya texnologiyaları sahəsinin prioritetliliyini sübut edir. "Mərkəz inkişaf etsə və ona sərmayələr yatırılsa, yaxşı nəticələr gözləmək lazımdır", - Gündüz vurğulayıb.
Ekspert güman edir ki, yeni mərkəz digər iri layihə ilə - Rabitə Nazirliyinin ölkədə regional innovasiya zonasının (RİZ) yaradılması layihəsi ilə əlaqələndirilsə, onun fəaliyyəti daha məhsuldar ola bilər. RİZ-in yaradılması layihəsi hazırda hökumətin müzakirəsindədir.
RİZ layihəsi kiçik və orta innovasiya sahibkarlığının inkişafı üçün texnoparkların, elektron avadanlıq və proqram məhsullarının istehsalı və ixracı üzrə regional bazanın yaradılmasını, ölkənin əlverişli tranzit informasiya mərkəzinə (Data Center) çevrilməsini, formalaşan informasiya cəmiyyəti üçün insan ehtiyatlarının hazırlanmasını, müxtəlif sahələrdə informasiya texnologiyaların tətbiqini nəzərdə tutur.
Hazırda Azərbaycanın Rabitə Nazirliyi sentyabrda təsis edilmiş Yüksək Texnologiyalar üzrə Tədqiqat Mərkəzi üçün sənədlərin hazırlanmasının (layihənin Nizamnaməsi, strukturu və ştat cədvəli üzrə təkliflərin işlənilməsi) üzərində işləyir, - Dövlət Idarəsindən bildiriblər. Mərkəz büdcə vəsaitləri hesabına maliyyələşdiriləcəyi üçün, sənədlər hazırlandıqdan sonra Maliyyə Nazirliyi ilə razılaşdırılmalı, sonra nəzərdən keçirilmək üçün hökumətə təqdim edilməlidir.
Mərkəz, informasiya texnologiyalarının inkişafında nanotexnologiyaların əhəmiyyətli rolunu nəzərə alaraq, Azərbaycan Nazirlər Kabinetinin sərəncamı ilə yaradılıb.