Azərbaycan, Bakı, 21 yanvar/ Trend müx. S.Babayeva/ "Azərbaycanda genişzolaqlı internet tarifləri region üçün orta səviyyəli hesab olunur, amma ölkənin işgüzar fəaliyyəti və iqtisadi inkişafını nəzərə alaraq, onların daha ucuz ola biləcəyini düşünürəm", çərşənbə günü Azərbaycanın rabitə və informasiya texnologiyaları naziri Əli Abbasov deyib.
"Məhz bu səbəbdən biz (rabitə nazirliyi) Tarif Şurası ilə birlikdə ölkədə İnternet resurslarına olan tarifləri aşağı salmaq qərarına gəlmişik", - qurumun rəhbəri bildirib.
Tarif Şurasının 30 dekabr 2008-ci il tarixli qərarına əsasən, internet xidmətlər göstərilməsi üçün rəqəmsal kanallara olan tariflər azaldılıb. Belə ki, abunəçilər üçün (büdcə təşkilatları istisna olmaqla) 2 Mqb/s şəhərdaxili rəqəmsal kanaldan (port) istifadə haqqı başqa 1,2 min manatdan 600 manata (50 faiz) qədər azaldılıb. Onlardan istifadənin aylıq ödənişi - 320 manatdan 300 manata (6,3 faiz), qoşulma və aylıq istifadə haqqı (Bakı istisna olmaqla) - 240 manatdan 200 manata endirilib. Şura həm də 2 Mqb/s-lik kanaldan hər tam və natamam 50 km üçün istifadə haqqını 180 manatdan 150 manata endirib (16,7 faiz).
Abbasovun sözlərinə görə, adlarını çəkmədiyi bir neçə böyük internet provayderlərlə onların göstərdiyi xidmətlər üçün qiymətlərin nəzərəçarpacaq dərəcədə azaldılması barəsində danışıqlar aparılıb.
"Təbii ki, bu kiçik provayderlərin fəaliyyətinə mane ola bilər. Ancaq, təəssüf ki, başqa yolumuz yoxdur. Danışıqlarımızın yekununa əsasən yaxın 15 gün ərzində böyük provayderlər qiymətləri nəzərəçarpacaq dərəcədə aşağı salacaq", - nazir qeyd edib.
Azərbaycanda 30-dan çox İnternet-provayder şirkəti və Ümumdünya şəbəkənin bir milyondan çox istifadəçisi vardır.
Müəllif ilə əlaqə ünvanı: [email protected]
