Azərbaycan, Bakı, 07 may / Trend , müxbir E.İsmayılov /
Azərbaycanın rabitə peykinin hazırlanması və orbitə buraxılması üzrə podratçı iyunda müəyyən olunacaq. Bu barədə cümə axşamı Azərbaycanın rabitə və informasiya texnologiyaları naziri Əli Abbasov bildirib.
"Bu məsələ ilə bağlı elan olunmuş tenderə iyunda yekun vurulacaq", - deyə Abbasov bildirib.
ABŞ, Rusiya və Fransadan olan beş şirkət ilk rabitə telekommunikasiya peykinin yaradılması və istifadəyə verilməsi üzrə tenderdə iştirak üçün ərizə təqdim edib.
Beynəlxalq Elektrorabitə İttifaqı (ITU) rabitə peyklərinin buraxılması üçün Azərbaycana üç orbitral mövqe təqdim edib. Onlardan ikisi yerli, biri beynəlxalqdır.
Peyklərin orbitə buraxılması həm dövlət büdcəsi, həm də güzəştli kreditlər hesabına həyata keçiriləcək. Qaytarılma müddəti beş-yeddi il təşkil edən güzəştli kreditlər hesabına ilk peykin buraxılması planlaşdırılır.
Rabitə peykinin buraxılma layihəsinin dəyəri 200 mln.dollar qiymətləndirilir.
Rabitə və İnformasiya Texnologiyaları Nazirliyinin proqnozlarına görə, layihənin dəyərini onun orbitə buraxıldığı vaxtdan beş il ərzində çıxarmaq mümkündür, qalan 15 il ərzində isə layihə Azərbaycana xeyli gəlir gətirəcək.
Dünya praktikasına görə, rabitə peykinin hazırlanması orta hesabla iki il, onun orbitə buraxılması isə əlavə olaraq bir-iki ay vaxt aparır.
Məqalə müəllifi ilə əlaqə ünvanı: [email protected]