Azərbaycan, Bakı, 14 oktyabr / Trend , müxbir H.Vəliyev/
Microsoft-un Azərbaycandakı nümayəndəliyi Azərbaycan Texniki Universitetində Microsoft IT Academy proqramının həyata keçirilməsinə başlayıb, Trend -a Microsoft Azerbaijan-ın "Təhsildə tərəfdaşlıq" layihəsi üzrə meneceri Emin Axundov bildirib.
Axundovun sözlərinə əsasən, layihə çərçivəsində universitetə 10 kompyuter verilib, universitet tələbələrinə, həmçinin maraqlanan hər kəs üçün münasib qiymətə Microsoft kurslarını keçmək imkanı yaradan təlim mərkəzi fəaliyyətə başlayıb.
Qiymətlərin münasibliyi kursların təşkili üçün kiçik xərclər hesabına əldə olunur. Microsoft mütəxəssisləri gələcəkdə MCP (Microsoft Certified Professional) dərəcəsinin alınması üzrə imtahan götürəcək təlimatçılar üçün xüsusi kurslar keçirir.
Microsoft-un gələcək planlarına layihənin "Qafqaz", "Xəzər" universitetlərində, Avropa liseyində və Zərifə Əliyeva adına məktəbdə keçirilməsi daxildir.
Microsoft IT Academy proqramı çərçivəsində təhsil müəssisələri üçün iştirakın iki səviyyəsi təklif olunur - Microsoft Office Specialist və IT Professional. IT Professional səviyyəsində stolüstü və daşınabilən personal kompyuterlərə texniki dəstək, kompyuter sisteminin inzibatçılığı, şəbəkələr və məlumatlar bazası, müxtəlif mühitlərdə əlavələr və məlumatlar bazasının hazırlanması kimi ixtisaslar üzrə mütəxəssislərin ilk peşəkar hazırlığı təklif olunur. Microsoft Office Specialist səviyyəsi orta məktəblər üçün nəzərdə tutulub. Bu səviyyədə kurslar çərçivəsində Microsoft Office-in istifadəçi əlavələrinin öyrənilməsi ilə yanaşı, biznes-sənədlərin (CV, anketlər, bəyanatlar və s.) düzəldilməsi sahəsində də təlim keçirilir.
Məqalə müəllifi ilə əlaqə ünvanı: [email protected]
