Azərbaycan, Bakı, 11 noyabr / Trend , müxbir H.Vəliyev/
Azərbaycan Səhiyyə Nazirliyi 190 mindən çox elektron sağlamlıq kartı verib. Bu barədə Səhiyyə Nazirliyinin informasiya şöbəsinin direktor müavini Cəbrayıl Əsədzadə Trend -a bildirib.
Onun sözlərinə görə, sistemə nazirliyin tabeliyində olan bütün doğum evləri, xəstəxanaların doğum şöbələri və uşaq tibb müəssisələri qoşulub. Müəssisənin şöbələri arasında xidməti məlumatların operativ mübadiləsinə imkan verən lokal şəbəkə yaradılıb. Tibb müəssisələrindən məlumatlar lokal şəbəkə vasitəsilə bilavasitə vahid verilənlər bankına gətirilir. Pasientlərin uçota alınmasının avtomatlaşdırılması lazımi məlumatın axtarışını sadələşdirir və diaqnoz qoyulması vaxtını azaldır.
Layihədə 18 yaşa qədər olan vətəndaşlar barədə məlumatların kağız arxivlərdən elektron formaya köçürülməsi nəzərdə tutulur. Yeniyetmələrdən fərqli olaraq, yeni doğulanlara plastik kartlar veriləcək. Elektron sağlamlıq kartları İctimai Səhiyyə və İslahatlar Mərkəzində hazırlanır və poliklinikalar vasitəsilə valideyinlərə pulsuz verilir.
Layihə "Elektron Azərbaycan" proqramı çərçivəsində hazırlanır.
Məqalə müəllifi ilə əlaqə ünvanı: [email protected]