Azərbaycan, Bakı, 07 yanvar / Trend , müxbir Ü.İsmayılova/
Azərbaycanın Əmək və Əhalinin Sosial Müdafiəsi Nazirliyi avtomatik idarəetmə sisteminin tətbiqinə başlayır. Bu barədə cümə axşamı nazirliyin Beynəlxalq əməkdaşlıq şöbəsinin müdiri Elnur Sultanov bildirib.
"İdarəetmə sisteminin avtomatlaşdırılması "Elektron Azərbaycan" layihəsi çərçivəsində tətbiq edilir", - Sultanov deyib.
Onun sözlərinə görə, Əmək Nazirliyi Rusiyanın "KORUS" şirkəti ilə nazirliyin avtomatlaşdırılmış idarəetmə sisteminin yaradılması ilə əlaqədar proqram üzrə müqavilə imzalayıb.
"Yanvarın sonundan etibarən nazirliyin bütün strukturları yeni sistem üzrə işə keçəcək, lakin avtomatlaşdırılmış sistemin tam tətbiq edilməsinin başa çatdırılması ilin sonunda gözlənilir", - Sultanov deyib.
Azərbaycanda 2005-ci ildən reallaşdırılan "Elektron Azərbayacan" layihəsinin növbəti mərhələsinin qəbul edilməsi gözlənilir.
Rusiyanın KORUS İT Holdinqi 1989-cu ildə təsis edilib. Holdinqin müəsisələri korporativ müştərilər üçün informasiya texnologiyaları, telekommunikasiya və istehsalın avtomatlaşdırılması sahəsində geniş spektrdə xidmətlər göstərir. Holdinq mütəxəssisləri korporativ informasiya sistemləri çərçivəsində müasir informasiya texnologiyalarına inteqrasiya edərək və uyğunlaşaraq biznes müştəriləri üçün onlardan optimal istifadəyə nail olurlar.