Azərbaycan, Bakı, 02 fevral / Trend , müxbir H.Vəliyev/
Azərbaycanda elektron rəqəmsal imzaların (ERİ) tətbiqi layihəsinin proqram hissəsi üzrə sınaq işləri başa çatmaq üzrədir. Bu barədə "Ultra" şirkətindən Trend -a deyilib.
Sınaq işləri Rabitə və İnformasiya Texnologiyaları Nazirliynin məlumat hesablama mərkəzi tərəfindən aparılır. Sistem yaxın zamanlarda təcrübi istismara veriləcək.
Layihə rəqəmsal imzaların verilməsi üzrə 3 mərkəzin yaradılmasını nəzərdə tutur. Mərkəzlərdən ikisi dövlət və özəl strukturlara xidməti həyata keçirəcək. Biri isə əsas mərkəz olacaq.
"Elektron Azərbaycan" Dövlət Proqramının əsası olan elektron rəqəmsal imzaların yaradılması üzrə işləri Microsoft Azerbaijan, Azerin və Ultra şirkətlərindən ibarət konsorsium aparır.
Konsorsium 2008-ci ilin sentyabrında elan edilmiş ERİ tətbiqi üçün milli açıq açar infrastrukturunun qurulması üzrə tenderin qalibi olub.
