Azərbaycan, Bakı, 4 mart / Trend , müxbir H.Vəliyev/
Regional Rabitə Birliyinin (RRB) poçt rabitəsi üzrə komissiyaları poçt rabitəsi sahəsində müasir informasiya texnologiyalarının tətbiqinin iqtisadi aspektlərini və elektron ticarət perspektivlərini müzakirə ediblər. Bu barədə Azərbaycan Rabitə və İnformasiya Texnologiyaları Nazirliyinin məlumatında bildirilir.
Bu məsələ martın 2-dən 4-dək Astanada RRB komissiyalarının 30-cu iclasında rabitə administrasiyası, Ümumdünya Poçt İttifaqı (ÜPİ) və RRB İcraiyyə Komitəsinin nümayəndələri tərəfindən müzakirə edilib.
İclas iştirakçıları həmçinin dünya maliyyə böhranının poçt rabitəsi sektoruna təsirini, RRB poçt sektoru işçi qruplarının 2009-cu ildəki fəaliyyətinə dair hesabatlarını, RRB çərçivəsində ekpress-poçt sisteminin yaradılması konsepsiyasını, 2010-cu ildə Keniyada ÜPİ strateji konfransına hazırlığı, MDB dövlətləri kitabxanalararası abonement sistemində kitabxana göndərişləri üçün güzəştli poçt tarifləri haqqında sazişi və digər məsələləri müzakirə edirlər.