Azərbaycan, Bakı, 10 mart / Trend , müxbir H.Vəliyev/
Rabitə və İnformasiya Texnologiyaları Nazirliyinin Dövlət Radiotezliklər İdarəsi (DRİ) mövcud problemləri və peyk rabitəsinin vəziyyətini müzakirə edib. DRİ-nin məlumatında bildirilir.
Bu məsələ martın 2-3-də Moskvada keçirilən seminar zamanı regional rabitə birliyi administrasiyası tərəfindən müzakirə edilib. Seminar "International Telecommunication Union"un (ITU) regional ofisi tərəfindən təşkil edilib.
Radiorabitə bürosu tezlikləri üzrə illik beynəlxalq informasiya sirkulyarının reqlamentinə əsasən, seminar iştirakçıları peyk rabitəsi sahəsində mütəxəssislərin hazırlanması və SpaceCom elektron ərizə formaları üçün məlumat toplanmasından ötrü proqram həllərindən istifadə qaydaları üzrə müvafiq işlərin aparılması barədə qərar qəbul ediblər.
Seminar iştirakçıları, həmçinin, 2012-ci ildə keçiriləcək ümumdünya radiorabitə konfransına hazırlıqla bağlı müvafiq işlərin aparılması məsələsinə toxunublar. Ümumdünya konfransının vəzifəsinə radiorabitə reqlamentinə, radiotezlik spektrindən, eləcə də geostasionar və qeyri-geostasionar peyk orbitindən istifadəni tənzimləyən beynəlxalq müqavilənin təhlili və yenidən baxılması daxildir.
