Azərbaycan, Bakı, 18 mart / Trend /
Noyabr ayında İranın birja bazarında ölkənin bütün birja əməliyyatlarının 10 faizinə bərabər olan ən iri sövdələşmə rəqabət şəraiti olmadan həyata keçirilib. Bu barədə İranın Rəqabət Şurasının sədri Cəmşid Pəjuyan bildirib. Məlumatı "Həmşəri" qəzeti yazır.
Bu saziş Tehran birjasında bağlandıqdan sonra İran iqtisadçıları, parlament nümayəndələri, hökumət və özəl sektorda çalışan şirkətlər birjada baş verən sazişdə rəqabətin olmamasına etiraz ediblər.
Bu səbəbdən İranın dövlət TCI-nin özəl sektora necə satılmasını təyin etmək Rəqabət Şurasına tapşırılıb. Qərara alınıb ki, Rəqabət Şurası sazişin ləğv olunmasına qərar verərsə, İranın telekommunikasiya şirkətinin səhmləri yenidən birjada satışa çıxarılacaq.
2009-cu ilin noyabr ayından indiyədək bu məsələni araşdıran Rəqabət Şurası nəhayət ki, mart ayının 13-də saziş haqqında öz son qərarını açıqlayıb. Tenderin rəqabət olmadan həyata keçirilməsinə baxmayaraq, qərara görə, Şura bu sazişin ləğvini dəstəkləməyib. Rəqabət Şurasının müqaviləni ləğv etmək haqqında qərar qəbul etməməsinin səbəbləri kimi, Pəjuyan müqavilənin ləğv olunmasının böyük maliyyə itkisi olduğunu bildirib.
"Şura belə bir qərara gəlib ki, müqavilənin imzalanması rəqabətin olmaması şəraitində baş verib və TCI hökumət monopoliyasından çıxarılaraq dövlətə məxsus digər bir şirkətin sərəncamına verilib", - o deyib.
Pəjuyan əlavə edib ki, Rəqabət Şurası sazişin düzgün və ya səhv olmasına dair qərar verməyib. Lakin artıq hökumət qərara alıb ki, telekommunikasiya bazarında rəqabətin olmasına nəzarət və qiymətlərin təyin olunması da bu Şura tərəfindən həyata keçirilməlidir.
İran iqtisadiyyatı tarixində ilk dəfə olaraq 2009-cu ilin noyabr ayında dövlət TCI-nin (Telecommunication Company of Iran) səhmləri "Etemad Mobin Development" konsorsiumu tərəfindən alınıb. Üç şirkətdən ibarət konsorsium dövlətə məxsus olan TCI-nin 50+1% səhmini 7,8 milyard dollara alıb.
"Etemad Mobin" şirkəti İran İnqilabı Keşikçiləri Korpusuna ("Sepah") aid bir şirkətdir. "Sepah"ın mövqeləri iqtisadi sahədə güclüdür. Müxtəlif fikirlərə görə, Keşikçilər Korpusu İran iqtisadiyyatının 1/3-nə nəzarət edir. Tender keçirilməmişdən bir neçə saat öncə həmin şirkətin səhmlərini almaq istəyən "Pişqamane Kəvire Yəzd" konsorsiumu tenderdən uzaqlaşdırılıb və beləliklə, "Etimad Mobin" şirkəti yeganə alıcı kimi İranın telekommunikasiya şirkətinin səhmlərini alıb.