Аzərbaycan, Bakı, 12 iyul /Trend, müxbir H.Vəliyev/
Mobil telefonların İMEİ kodlarının qeydiyyat sisteminin işə salınması layihəsini nizamlayan yekun sənədlər üzərində işlər başa çatıb, - bu barədə bazar ertəsi Trend-ə "RCom" şirkətinin rəhbəri Seymur Məmmədov deyib.
Sistem inteqratoru funksiyalarını yerinə yetirən Azərbaycanın "RCom" sistemin texniki cəhətdən qurulması üzrə işləri həyata keçirən şirkətdir.
Sənəd mobil rabitə, idxalçılarla yanaşı, bir sıra istifadəçi operatorların qaydalarını nizama salmağa yönəldilib.
Məmmədovun sözlərinə görə, sənəd tərkibi respublikanın nazirlik və idarələrinə daxil olan layihə iştirakçıları arasında imzalanmış razılığa əsasən, baxılmaq üçün Azərbaycan Nazirlər Kabinetinə təqdim olunub.
"Hal-hazırda layihəni gerçəkləşdirəcək qaydalar hazırlanır. Qaydaların rəsmi təsdiqi avqust- sentyabr aylarında gözlənilir. Sənədlərin qəbul olunması layihədə mobil rabitə operatorlarının rolunu konkretləşdirməyə imkan verəcək", - Məmmədov deyib.
Hökumət artıq layihənin gerçəkləşdirilməsi üçün əsas olacaq müvafiq planın hazırlanması üçün nazirliklərə tapşırıq verib.
Layihə çərçivəsində bütün məlumatlar Rabitə və İnformasiya Texnologiyaları Nazirliyində yaradılacaq vahid baş mərkəzə daxil olacaq. Məlumat bazası Azərbaycan ərazisinə gətirilən mobil telefonların İMEİ kodları hesabına doldurulacaq. Qeydiyyat gömrük orqanları vasitəsilə həyata keçiriləcək.
Məlumat bazası yaradıldıqdan sonra, mobil telefon bazarının vəziyyəti barədə məlumat əldə ediləcək (bazarın həcmi, qanuni və qeyri-qanuni məhsulların keyfiyyəti). Yeni sistem ölkəyə telefonların qeyri-qanuni idxalının qarşısını almağa imkan verəcək.
Layihəyə mobil rabitə operatorları ilə yanaşı, dövlət idarələri də cəlb olunub. Ölkəyə gətirilən mobil telefonlara nəzarət və onların qeydiyyatı Dövlət Gömrük Komitəsi tərəfindən həyata keçirilir. Layihənin nizamlayıcısı Rabitə və İnformasiya Texnologiyaları Nazirliyidir.