Azərbaycan, Bakı, 22 iyul /Trend, müxbir H.Vəliyev/
Rusiya ilə Azərbaycan arasında Dərbənd-Quba sahəsində transsərhəd keçidinin tikintisi Rusiyanın mobil rabitə operatoru, ölkənin milli "Sinterra" operatorunun səhmlərinin 100 faizini alan "MeqaFon" ASC-nin gələcək strategiyasından asılıdır. Bu barədə cümə axşamı Trend-ə "Azertelekom" şirkətindən bildiriblər.
Rusiyanın "Sinterra" və Azərbaycanın "Azertelekom" şirkətləri "C-Ring Telecom" müəssisəsinin payına bərabər (hər biri 50 faiz) sahibdirlər. Müəssisənin yaradılması barədə sənədlər 2009-cu ildə Bakıda imzalanıb.
Bu gün Azərbaycan tərəfi gözləmə mövqeyində durur və məsələnin müsbət həlli bu layihənin gələcək inkişaf yollarını müəyyən edəcək.
"C-Ring Telecom" artıq Azərbaycan və Rusiyanın milli operatorlarının telekommunikasiya infrastrukturlarını birləşdirən optik-lif kabel magistralının Azərbaycan seqmentinin tikintisini başa çatdırıb. Operatorlar tərəfindən magistral xəttin sınaqdan keçirilməsi üzrə işlər görülür. Həmin magistralın bazasında ilkin buraxılış qabiliyyəti 10 Gbit/saniyə olan beynəlxalq rabitə xətti yaradılacaq.
İnfrastrukturun Rusya seqmenti də layihənin başa çatmasına hazırdır. Bundan əvvəl "Sinterra" şirkətlər qrupunun mətbuat katibi Yekaterina Andreyevanın Trend-ə bildirdiyinə görə, "Sinterra" özünün Mahaçqaladakı milli magistral qovşağından Rusiya tərəfdən sərhəd zonasına girişədək 180 kilometrdən artıq əsas və ehtiyat optik-lif rabitə xəttinin çəkilişini həyata keçirib.
Layihənin reallaşdırılması Azərbaycan və Rusiya bazarlarında operatorların coğrafi mövcudluğunu genişləndirməyə, eləcə də Xəzəryanı ölkələrin yaxınlaşmasına imkan verəcək.
"C-Ring Telecom" müştərək müəssisəsi Azərbaycan və Rusiya ərazilərindəki layihələrində "Azertelekom" və "Sinterra" ehtiyatlarından və infrastruktur imkanlarından istifadə etmək imkanı əldə edəcək. Bu, Azərbaycan biznesinə və əhalisinə "Sinterra"nın təqdim etdiyi rabitə xidmətləri kompleksindən istifadə etməyə imkan verəcək. Bunlara beynəlxalq-şəhərlərarası rabitə, magistral kanalların icarəsi, IP MPLS şəbəkəsi bazasında xidmətlər, internetə çıxış, MİM (məlumatların işlənməsi mərkəzi) şəbəkəsinin və "call-mərkəz"in resurslarından istifadə daxildir. Baza telekommunikasiya xidmətlərindən (telefoniya, məlumatların ötürülməsi, internet xidmətləri) istifadə ilə "Azertelekom", innovasiya xidmətlərinin (MİM, "call-mərkəz", GRID-texnologiyalar, kontent xidmətləri) inkişafı ilə "C-Ring Telecom" məşğul olacaq.
