Azərbaycan, Bakı, 7 avqust/Trend, müxbir Q.Vəliyev/
Azərbaycan Rabitə və İnformasiya Texnologiyaları Nazirliyinin İnformasiya-Hesablama Mərkəzi "Xalq kompüteri" çərçivəsində ADSL üzrə İnternetə daxil olmaq üzrə güzəştli xidmətlərin təklif edilməsi üçün proqram təminatını hazırlayıb. Bu barədə nazirliyin məlumatında deyilir.
Nazirliyin məlumatına görə, bu günədək uçot sisteminin yaradılması üzrə işlər başa çatdırılıb və kredit ödənişləri elektron ödənişlər vasitəsilə edilir.
Bu günədək "Xalq kompüteri" layihəsinin ikinci mərhələsi çərçivəsində 4,4 min ədədə yaxın fərdi kompüter satılıb. Onların əksəriyyəti portativ qurğuların payına düşür.
Layihə çərçivəsində realizə edilən fərdi kompüterlərin ümumi sayı 7,9 min ədədə çatır.
"Xalq kompüteri" layihəsinin birinci pilot mərhələsinin həyata keçirilməsinə 1,850 milyon manat investisya yatırılıb və nəticədə 3,5 min kompüter realizə edilb ki, onların da 834 ədədi Bakıda, qalanı isə regionlarda satılıb.
Layihənin növbəti mərhələsində iştiraka antivirus proqram təminatının hazırlayıcısı "Symantec"şirkəti və kompüterlər realizə edildiyi halda məhsulu əlavə olaraq təchiz edilən Azərbaycanın kompüter istehsalçısı "Kür" şirkəti maraq göstərib.
İyulun əvvəlində "İntel" şirkəti də layihədə iştiraka maraq göstərib.
Pilot layihə ötən ilin aprelində start götürüb, "Xalq kompüteri" layihəsinin əsas mərhələsinin həyata keçirilməsi üzrə saziş isə iyunun sonunda imzalanıb.
"Xalq kompüteri" layihəsi çərçivəsində təqdim edilən kompüterlər orta və ali məktəb müəllimləri üçün nəzərdə tutulub və faizsiz 12 aylıq müddətə kredit şərti ilə bazar qiymətlərindən 25-40 faiz aşağı satılır.
Layihə "HP" və "Microsoft" şirkətlərinin iştirakı ilə həyata keçirilir. Texnika təchizatı "HP"nin yerli tərəfdaşı "Best Comp Group" tərəfindən həyata keçirilir.